Seraban 32 iku Kunsilor ngangkat sumpah mangku pengawa kemari

BARU DICHIRI: Lo (duduk tengah) begambar bebala mayuh enggau kunsilor MPP ke baru dichiri pengudah tembu pengawa di Kuching kemari.

KUCHING: Pengawa ngangkat sumpah raban Kunsilor baru ungkup timpuh 2016 nyentuk ngagai 2018 Opis Kunsil Kandang Padawan (MPP) dikemujur kemari di begunan opis kunsil nya.

Tiga puluh dua iku Kunsilor ti diuluka Chairman MPP, Cr Ir. Lo Khere Chiang ngemujur pengawa nya sereta nyain surat chiri besaksika Menteri Opis Kunsil Kandang Menua, Datuk Dr.
Sim Kui Huan.

Bela bisi ngangkat sumpah, sapit chairman MPP ke baru Dato Ahmad Dato Sri Ibrahim ke alai pengawa mega dikemata Menteri Muda Opis Kunsil Kandang Menua, Datu Dr Penguang Manggil enggau Sekretari Mendam, Bakrie Zaini.

Lo ba jaku pengelalu rambau pengawa nya ngansak semua kunsilor ke udah dipilih bejalaika tanggungpengawa enggau chara profesional sereta engkeman ngambika ulih ngeransing atur pemansang ke udah ditusun Perintah Nengeri.

Iya madah MPP udah ngenuku Pelin Strategik ungkup 2016 – 2020 ngambika ulih ngemujur semua program ti udah ditusun lalu nempa MPP nyadi sebengkah opis kunsil ke tegap.

“Raban kunsilor enggau orang gawa MPP ngembuan tanggungpengawa besai nentuka semua program ke udah ditusun dalam timpuh lima taun dijapai.

“Nyadi sebengkah pengawa ke berat ba raban kunsilor ke nyadi orang ti mutuska polisi ngenuku polisi ke engkeman ti tau nyukung lalu ngelanchar semua program ke ditusun MPP,”ku iya.

Ngenang kaul ke sama, Lo ke mega ADUN Batu Kitang ngarap raban kunsilor MPP ransing agi ngaul komuniti lalu matak sida ngaga kerejasama enggau opis kunsil ba atur ngintu pemeresi enggau pemaik kandang endur ke dikuasa MPP.

Ku iya, pemar ke ditapi MPP diatu iya nya matak komuniti ke diau ngelingi ngambi bagi ba semua program ke bisi diatur.

“Aku arap nengah ikas pelajar ke tinggi ke dikembuan komuniti sereta runding ke manah, program rama kitai ulih ngenegap kaul entara komuniti,’ ku iya.

August 5, 2016, Friday, Borneo Post