Dagang judi enda dikemendar

 

Halaman Utama (/) » Iban (http://www.utusanborneo.com.my/iban) » Dagang judi enda dikemendar 

Utusan Borneo Online: 2017-06-08  oleh Rengenyan Labang
Pemutus digaga berindik ari mesin ikan dituku aktiviti judi 

KUCHING: Majlis Pebandaran Padawan (MPP) udah ngemendarka perambu enda ngemendarka semua operasyen dagang ti ngelanggar atur baka judi ba kandang endur ke dikuasa opis kaunsil nya. 

Chairman MPP, Lo Khere Chiang madahka pemutus nya digaga berindik ari mesin ikan disahka nyadi aktiviti judi baka ke dipadahka IPD Padawan enggau Ketuai Opis Nasat Pengawa Salah Sarawak SAC Datuk Dev Kumar dalam penerang berita sebedau tu. 

Iya madahka MPP begunaka bantu ari piak bekaul ngemunaska aktiviti judi dalam sitak nya. 

“Kaban kaunsil enggau aku empu udah ngemendarka sebengkah perambu maya baum khas kaunsil penuh kami sehari tu (kemari) iya nya perambu enda ngemendarka semua operasyen dagang ti ngelanggar atur ba kandang endur ke dikuasa MPP. 

“MPP begunaka bantu polis nangkap sesapa ke ditemu ngelanggar undang-undang enggau ke merangsang pengawa bejudi ke ngelanggar atur. 

“Aku minta polis ngabas ngenyit enggau nutup semua operasyen ke bekaul enggau aktiviti mesin ikan ba kandang endur ke dikuasa MPP. Kami (MPP) deka meri kerejasama ngagai polis ngemunaska operasyen mesin ikan tu,” ku iya. 

Lo mansutka pekara nya dalam aum pengarang berita ke diatur ba bilik aum MPP pengudah aum khas kaunsil penuh MPP, kemari. 

Nitihku Lo, diatu nadai agi family amusement entertaiment licence dikeluarka dalam kandang endur ke dikuasa MPP, berindik ari empat lisin ke dikeluarka sebedau tu udah dikinsil. 

“Sebarang lisin ke ditemu (nyema bisi) enda ngira bagi premis semua nya palesu lalu aku minta pengemeran nya ningkilka lisin palesu nya, laban enti palesu enggau nipu nya ulih ditinggang ukum berat,” ku iya. 

Beduduk ari pekara nya Lo minta Kaban Kunsil Nengeri (ADUN) Kota Sentosa ti mega Kaban Parlimen Bandar Kuching Chong Chieng Jen ngetu ngaga penerang negatif ke ulih nyaru runding entara iya, MPP enggau polis. 

Lo bepenemu, Chong enti ngembuan pengelurus ati sereta nyadi pengari rayat renggat perintah besai enggau nengeri, kelimpah ari ngembuan bukti teguh pasal bala pengemeran judi nya ngelanggar undang- undang, patut mai pekara nya ngagai renggat Parlimen sereta madah ngagai Bukit Aman awakka nutup semua kedai mesin ikan di serata menua. 

Anang enda ingat ku Lo, di Pulau Pinang ke nyadi kubu tegap DAP nyentuk ke diatu nadai udah ngaga atur deka nutup semua kedai mesin ikan ke ngerembai din. 

“Tang aku ari MPP udah ngepun nutup semua kedai judi mesin ikan ba semua kandang endur ke dikuasa MPP,” ku iya. 

Chong seiku orang ke bejaku besai tang enda kala mai isu nya ngagai Parlimen sereta enda berani minta bos besai sida Kepala Menteri Pulau Pinang, ngemunnaska operasyen ti ngelanggar atur nya, ku Lo ti mega ADUN Batu Kitang. 

Sama bisi datai ba aum pengarang berita nya kemari, Sapit Chairman MPP Datuk Ahmad Ibrahim enggau ke bukai.