SIDCA dipeda jampat mansang taja baru setaun udah ditumbuh, ku Ajat

Halaman Utama (/) » Iban (http://www.utusanborneo.com.my/iban) » SIDCA dipeda jampat mansang taja baru setaun udah ditumbuh, ku Ajat

Utusan Borneo online: 2017-04-17

 
KUCHING: Gerempung Main Asal enggau Tanda Iban Sarawak (SIDCA) udah ngintu pengerami makai lemai dikena ngerami genap setaun penumbuh gerempung nya ba Crown Square ditu, malam ensanus. 
 
Presiden SIDCA Ajat Sumoh ba jaku pengelalu madah tajapan baru beumur setaun, gerempung pechaya ulih nyaup ngerembai main asal enggau tanda Iban di nengeri tu. 

Ku iya, gerempung dipeda chukup jampat mansang sereta udah ngemujur semua perambu ke ditusun kenyau ditumbuh. 

“Mayuh aktiviti ke bekaul enggau main asal enggau tanda Iban udah diadu SIDCA ba taun ke udah. 

“Berindik enggau nya, kitai ngarap ulih ngaga mayuh agi aktiviti ba taun tu sereta ba taun ti deka datai,’ku iya ba pengerami ti ngangkatka Adun Batu Kitang Lo Khere Chiang nyadi temuai dipebasa. 

Entara sekeda aktiviti ti mujur diadu SIDCA iya nya Teater Main Asal Iban di Palan Pematih Pengajar Kampus Batu Lintang. 

Ngasaika teater nya udah nempa pemujur, Ajat ngenataika jaku puji ngagai gerempung lalu ngarap aktiviti ke sama ulih digaga baru jemah ila. 

“Nengah teater ke baka tu, kitai ulih ngemansang main asal enggau tanda Iban lalu dikerembai ba media rama,”ku iya. 

Ngenang kaul ke sama, Lo ba jaku iya ngarap bansa Iban enggau naka ulih ngenanka adat sereta main asal ke nyadi identiti bansa. 

“Ba aku, main asal ulih dikena matak orang dagang temuai datai ke nengeri tu. 

“Sarawak ngembuan mayuh main asal sereta pupu bansa ke unik, nengah promosyen ulih matak mayuh agi orang dagang temuai datai ke nengeri tu,”ku iya. 

Ba pengerami nya, Lo bisi ngagihka geran projek mit menua pesisir (MRP) penyampau RM10,000 ngagai SIDCA kelimpah agih belanja RM10,000 ke bela diberi MP Sarawtok ke mega Presiden SDNU Tan Sri William Mawan Ikom. 

Kededua geran ari Lo enggau Mawan dikena mantu SIDCA ngatur mayuh agi aktiviti jemah ila. 

Bela datai Panglima 1Divisyen Infantri Mejar Jeneral Datuk Stephen Mundaw engggau Mandal Presiden III Sarawak Dayak National Union (SDNU) Churchill Edward.