Kitai patut bisi penyiru ba orang ke tusah, ku Lo

Halaman Utama (/) » Iban (http://www.utusanborneo.com.my/iban) » Kitai patut bisi penyiru ba orang ke tusah, ku Lo

Utusan Borneo Online: 2014-10-02

 
Enda ngira raban NGO, kaban parti politik tauka IPT, anang enda besaup ngelempungka penusah orang bukai
Dikarang Rengenyan Labang // 

KUCHING: Penengap runding deka mantu orang bukai enggau enda begaji patut dikemeran sereta dikemeratka semua raban nembiak, enda ngira sekalika sida ari gerempung ukai dikuasa perintah (NGO), parti politik tauka institiut pelajar tinggi (IPT). 

Chairman Parti Bersatu Rakyat Sarawak (SUPP) Pampang Kota Sentosa Lo Khere Chiang madah, nya pekara tauka ulah ti manah dikena ngelempungka orang ti tusah tauka seranta ke begunka bantu. 

“Aku berasai temegah sereta ransing ati meda raban nembiak parti SUPP pampang Kota Sentosa, Batu Kawa, Batu Lintang, UNIMAS enggau Salvation Army ti bejalaika pengawa rama tauka ngereja pengawa enda begaji ti patut dichunto raban nembiak bukai. 

“Ujung minggu nyin kemari raban nembiak nya (SUPP pampang Kota Sentosa, Batu Kawa, Batu Lintang, UNIMAS enggau Salvation Army) mantu ruang bilik seranta iya nya Bong Chee Ping sebilik bepindah ari rumah suwa di MJC ngagai PPR Batu Gong Park, tu pekara ti amat manah. 

“Nya alai aku deka meransang mayuh agi raban bansa kitai lebih agi nembiak SUPP sama ngambi bagi dalam aktiviti ti besai reti tu iya nya mantu orang ti tusah, mantu orang enggau enda begaji. Amat kitai datai mantu ukai ngena duit tang ke pemadu beguna kitai datai mai sukung moral,” ku iya. 

Lo ti mega Chairman Majlis Perbandaran Padawan (MPP) mansutka pekara nya ngagai raban pengarang berita maya ti nemuai ngabas Bong sebilik ba PPR Batu Gong Park, Jalai Kuching – Serian ditu, kemari. 

Nambahka nya Bong, 46, lebuh dikerandau iya enggau bini iya Lau Hui Ching bisi lima iku anak ti beumur 3 ngagai 15 taun (tiga lelaki & dua indu) sereta seiku anak iru (lelaki) ti beumur 16 taun ke nyelai pendiau (OKU). 

Nitihku Bong sida sebilik bisi udah nerima bantu ari Opis Pengintu Pengelantang Raban Bansa (JKM) RM450 sebulan kenyau bulan Januari 2014 kelimpah ari Suruhanjaya Perumahan ti ngemendarka nyuwa ba PPR nya enggau ari SUPP sereta ke bukai. 

Bong ti asal ari Batu 17 Kuching Serian enggau Lau asal ari Miri , tiga taun sebedau tu diau sereta gawa di Miri sebedau ke nyuwa di MJC. 

Bong sebedau tu gawa nyadi pekereja kasar tang bulan Februari 2014 iya ditemu betapi enggau penyakit tungkul ati lalu dilalau lutur ngetu ngereja pengawa berat, berengkah ari nya ruang bilik tu betapi enggau penusah sereta anak bisi enda nurun sekula. 

“Kami amat beterima kasih ngagai perintah, Suruhanjaya Perumahan ti ngemendarka kami nyuwa ba PPR Batu Gong tu, Datuk Fatimah Abdullah nengah JKM ti meri bantu belanja bulan sereta lebih agi ngagai Lo ti udah mega mayuh mantu kami sebilik ti nyengkaum bantu belanja,” ku Bong. 

Berindik ari pekara nya Lo meransang raban bansa di menua tu sama mantu ruang bilik Bong ti mengkang beguna bantu enggau sukung. 

“Ngagai raban bansa di luar din ke deka mantu ruang bilik Bong tu tau nengah SUPP Pampang Kota Sentosa,” ku Lo.