Lo: Padawan International 4 x 4 Off Roaders Extreme Challange dikearap ulih matak temuai

Halaman Utama (/) » Iban (http://www.utusanborneo.com.my/iban) » Lo: Padawan International 4 x 4 Off Roaders Extreme Challange dikearap ulih matak temuai

Utusan Borneo Online: 2015-02-27

KUCHING: Opis Kaunsil Kandang Bandar Padawan (MPP) deka ngatur Padawan International 4×4 Off Roaders Extreme Challange 2015 (keterubah) kenaka 23 – 24 Mei tu ila. 
 
Chairman MPP Ir Lo Khere Chiang madah, pekit dua hari berunggu nya deka diatur di Palan Pengentap Pendiau Bengoh. 

“Pekit entara sebengkah agi chara kitai ngelakuka Bukit Tinggi Borneo ngagai temuai ari menua luar. 

“Aku pechaya pekit renggat antarabansa tu ulih nyaup nyungkak industri dagang temuai di menua tu kelimpah ti ngenataika pemisi belanja ngagai rayat ke diau ngelingi,” ku Lo ba sebengkah aum pengarang berita di Opis MPP ditu, kemari. 

Lo nambah, MPP merambu ngatur pekit nya ninting taun ke alai sukung ari sekeda raban menteri enggau kompeni peribit chukup manah. 

Ku iya, Menteri Muda Pengerai Mensia Mayuh ke mega ADUN Bengoh setuju ngagihka belanja RM100,000 kena ngemujur pekit nya ke alai Opis Menteri Pemansang Rama bisi ngagihka RM20,000. 

Ngenang kaul ke sama, Chairman Pengatur Padawan International 4 x 4 Off Roders Extreme Challange 2015, Wilfred Yap madah, pekit nyadi sebengkah ari program pemansang komuniti. 

“Nengah pekit tu kitai ulih ngelakuka Padawan ti tebilang enggau pemanah rampa menua ngagai komuniti antarabansa. 

“Program pemansang komuniti tu deka mai ubah...ungkup pengerembai pemisi rayat ke diau ngelingi,”ku iya. 

Wilfred ke mega Sekretari Besai Raban Nembiak SUPP madah, pekit deka digulu raban penyereta ari menua Indonesia, Brunei, Sabah, Semenanjung Malaysia kelimpah ari penyereta menua tu empu. 

Iya netapka enda kurang ari 60 tim deka ngambi bagi ba pekit nya.